नारायणगढ (चितवन) । रसुवाको भोटेकोशीमा आएको बाढीपछि त्रिशूली र नारायणी नदी किनारबाट चितवनमा फेला परेका शवको व्यवस्थापन तथा पहिचान प्रक्रिया जारी छ । शवको वैज्ञानिक पहिचानका लागि आफन्तबाट ‘डिएनए’ नमूना सङ्कलन गर्ने कामसमेत भइरहेको छ ।
जिल्ला प्रहरी कार्यालय चितवनका प्रहरी नायब उपरीक्षक चन्द्रभूषण यादवका अनुसार हालसम्म जिल्लामा ३६२ शव फेला परेका छन् । तीमध्ये ३३३ शवको व्यवस्थापन भइसकेको छ भने १४ शवको सनाखतपछि आफन्तको जिम्मा लगाइएको छ ।
शवको वैज्ञानिक पहिचानका लागि भदौ १६ गतेदेखि डिएनए नमूना सङ्कलन सुरु गरिएको हो । भदौ २० गतेसम्म हराइरहेका व्यक्तिका ६८ जना आफन्तको डिएनए नमूना सङ्कलन गरिएको यादवले जानकारी दिनुभयो ।
भदौ १६ गते सात पुरुषको नमूना सङ्कलन गरिएको थियो । भदौ १७ गते २६ जनाको नमूना लिइएकामा दुई महिला, २२ पुरुष र दुई भारतीय पुरुष नागरिक छन् । भदौ १८ गते २२ जनाको नमूना सङ्कलन गर्दा चार महिला, १४ पुरुष, एक बालक र तीन भारतीय पुरुष नागरिक रहेका छन् ।
त्यस्तै, भदौ १९ गते सात जनाको नमूना सङ्कलन गरिएकोमा एक महिला, चार पुरुष, एक बालक र एक भारतीय पुरुष छन् । भदौ २० गते थप छ जनाको नमूना लिइएकामा दुई महिला, एक पुरुष र तीन बालक रहेका छन् ।
प्रनाउ यादवका अनुसार हराइरहेका व्यक्तिको खोजी, शवको पहिचानका लागि डिएनए परीक्षण, बेपत्ता व्यक्तिको विवरण सङ्कलन तथा सम्बन्धित निकायसँगको समन्वय निरन्तर भइरहेको छ ।
