काठमाडौँ । रसुवास्थित भोटेकोशी नदीमा भदौ १० गते आएको विनाशकारी बाढीमा परी ज्यान गुमाएकामध्ये हालसम्म १ हजार ३४१ जनाको शव फेला परेको छ भने ४ हजार ४४ जना अझै सम्पर्कविहीन रहेका छन् ।
प्रहरी प्रधान कार्यालय नक्सालले आइतबार बिहान सार्वजनिक गरेको पछिल्लो विवरणअनुसार फेला परेका शवमध्ये ३२५ महिला, ५२३ पुरुष र ४९३ वटा पहिचान खुल्न नसकेका शव रहेका छन् । नेपाल प्रहरीका केन्द्रीय प्रवक्ता एवं प्रहरी नायब महानिरीक्षक अविनारायण काफ्लेले बेपत्ताको संख्या ४ हजार ४४ रहेको जानकारी दिए ।
बेपत्तामध्ये २ हजार ८६३ नेपाली पुरुष, ५७५ नेपाली महिला, २६९ विदेशी पुरुष, ३३२ विदेशी महिला र पाँच जना अन्य रहेका छन् ।
प्रहरीका अनुसार बाढी प्रभावित क्षेत्रमा बेपत्ताको खोजी, उद्धार तथा शव व्यवस्थापनको काम निरन्तर भइरहेको छ । फेला परेका शवमध्ये १ हजार ३७ शव सुरक्षित रूपमा जमिनमा गाडेर व्यवस्थापन गरिएको छ भने बाँकी शवको पहिचान तथा व्यवस्थापन प्रक्रिया जारी छ ।
बाढीपछि हालसम्म ९ हजार १५१ जना घाइतेको उद्धार गरिएको छ । उद्धार गरिएकामध्ये ३ हजार ९८ जनालाई सुरक्षित रूपमा होल्डिङ सेन्टरमा राखिएको प्रहरीले जनाएको छ ।
यसैगरी, शवको पहिचान तथा बेपत्ताको सनाखतका लागि मृतक १ हजार २८६ जना र मृतकका आफन्त १ हजार १८६ जना गरी २ हजार ४७२ जनाको डीएनए नमूना सङ्कलन गरिएको छ ।
प्रवक्ता काफ्लेका अनुसार बेपत्ताको पहिचान र फेला परेका शवको सनाखत गर्न डीएनए नमूना सङ्कलनलाई प्राथमिकताका साथ अघि बढाइएको छ ।
भोटेकोशी बाढीपछि ठूलो मानवीय क्षति भएको भन्दै नेपाल प्रहरीसहितका सुरक्षा निकाय तथा विभिन्न सरकारी निकायले खोजी, उद्धार र शव व्यवस्थापन कार्यलाई निरन्तरता दिइरहेका छन् ।
