काठमाडौँ । कास्कीको अन्नपूर्ण गाउँपालिका–११ स्थित किम्रोङ खोलामा एक्कासि पानीको बहाव रोकिएपछि गाउँपालिकाले खोला तथा नदी तटीय क्षेत्रमा बसोबास गर्ने स्थानीयलाई उच्च सतर्कता अपनाउन आग्रह गरेको छ।
आज साँझ करिब ६ः३० बजेदेखि किम्रोङ खोलाको बहाव अवरुद्ध भएको सूचना स्थानीयबाट प्राप्त भएको गाउँपालिका अध्यक्ष विष्णुबहादुर केसीले जानकारी दिए। खोला कुन स्थानमा र पहिरो वा अन्य के कारणले थुनिएको हो भन्नेबारे भने यकिन हुन नसकेको उनले बताए।
अध्यक्ष केसीका अनुसार पानीको बहाव अवरुद्ध भएको खबर पाएपछि आफू स्थलगत निरीक्षणका लागि वीरेठाँटीतर्फ जाँदैछन्। उनले किम्रोङखोला र मोदीखोला आसपासका तटीय क्षेत्रमा बसोबास गर्ने नागरिकलाई विशेष सावधानी अपनाउन आग्रह गरेका छन्।
किम्रोङ खोला मोदी नदीमा मिसिने भएकाले सम्भावित जोखिमलाई मध्यनजर गर्दै कास्की र पर्वतका नदी तटीय क्षेत्र, विशेषगरी वीरेठाँटी, नयाँपुललगायतका स्थानमा उच्च सतर्कता अपनाउन गाउँपालिकाले अपिल गरेको हो।
किम्रोङ खोलामा गत असार २८ गते पनि एक्कासि आएको बाढीले पुल बगाउनुका साथै होटलमा क्षति पुर्याएको थियो।
