ललितपुर । रसुवाको भोटेकोशीमा यही भदौ १० गते आएको बाढीमा परी १५७ जना अझै सम्पर्कविहीन छन्। उनीहरूको खोजी कार्य जारी रहेको ललितपुरका प्रमुख जिल्ला अधिकारी नरहरि घिमिरेले जानकारी दिएका छन्।
सम्पर्कविहीन भएकामध्ये हालसम्म नौ जना फेला परेका छन्। फेला पर्नेमा तीन पुरुष, दुई महिला र चार बालबालिका रहेका छन्। बाँकीमध्ये ११५ पुरुष, ३९ महिला र तीन बालकको खोजी भइरहेको छ।
सम्पर्कविहीनमध्ये ९९ जना अन्य जिल्लाका स्थायी बासिन्दा भएर ललितपुरमा बसोबास गर्दै आएका व्यक्ति छन्। उनीहरूमा ८१ पुरुष, १७ महिला र एक बालक रहेका छन्।
त्यस्तै, बाढीमा परी ललितपुरमा बसोबास गर्ने ४१ विदेशी नागरिक पनि हराइरहेका छन्। तीमध्ये २० महिला, १९ पुरुष र दुई बालक छन्। हराइरहेका विदेशी नागरिकमा युक्रेनका १३, अस्ट्रेलियाका १०, अमेरिका र भारतका पाँच–पाँच, चीनका चार, कोरियाका तीन र बेलायतका एक जना रहेका छन्।
बाढीमा परी घाइते भएका २४ जनामध्ये २२ जना उपचारपछि घर फर्किएका छन्। घाइतेमध्ये २० पुरुष, तीन महिला र एक बालिका रहेका छन्। एक पुरुषको ग्वार्कोस्थित बी एन्ड बी अस्पतालमा उपचार भइरहेको छ भने घाइते बालिकाको वीरेन्द्र सैनिक अस्पताल, छाउनीमा उपचार भइरहेको प्रजिअ घिमिरेले बताएका छन्।
यसैगरी, बाढीमा परी मृत्यु भएका पाटन सुन्धाराका दुई जनाको शव परिवारको जिम्मा लगाइएको छ। मृतकमा एक महिला र एक पुरुष रहेका छन्।
