गोरखा । उत्तरी गोरखाको चुमनुब्री गाउँपालिका–४ नाम्रुङमा बूढीगण्डकी र थेराङ खोलामा आएको बाढीले दुई पुल र दुई जलविद्युत् आयोजना बगाएको छ । बाढीका कारण चुमनुब्रीवासीको आवतजावत तथा विद्युत् सेवा प्रभावित भएको छ ।
स्थानीय लाक्पा डुण्डुप लामाका अनुसार पहिरोसहित आएको बाढीले मनास्लु पदमार्गका दुईवटा पुल बगाएको हो । थेराङ खोलामा आएको बाढीले नाम्रुङबाट मनास्लु क्षेत्रतर्फ जाने पुल बगाएको छ भने त्यसपछि बूढीगण्डकीको बहाव बढ्दा नाम्रुङभन्दा तल जङ्गलस्थित पुलसमेत बगेको उनले बताए ।
“बाढी र पहिरोले गाउँवासीलाई जोखिममा पार्यो । गाउँबाट तल जाने पुल र माथि जाने पुल दुवै बगाएपछि कतै जान सक्ने अवस्था छैन,” लामाले भने ।
बाढीले स्थानीयले प्रयोग गर्दै आएका दुई लघुजलविद्युत् आयोजनामा समेत क्षति पुर्याएको छ । हालै करिब रु सात करोड खर्चमा निर्माण सम्पन्न भई परीक्षण प्रसारणमा रहेको १०० किलोवाट क्षमताको आयोजना तथा लामो समयदेखि सञ्चालनमा रहेको २२ किलोवाट क्षमताको अर्को आयोजना बाढीले बगाएको स्थानीयले बताएका छन् ।
विद्युत् सेवा अवरुद्ध भएपछि बत्ती, सञ्चारलगायत विद्युत्मा निर्भर सेवा प्रभावित भएका छन् । पुल बगेपछि मनास्लु क्षेत्रमा सुरु हुन लागेको पर्यटक आवागमनसमेत प्रभावित भएको छ । लार्केपासका लागि पुगेका सयौँ पर्यटक बूढीगण्डकीको पुल नहुँदा समस्यामा परेको बताइएको छ ।
यसैबीच, पहिरोसहित आएको बाढीले राति स्थानीय चारवटा घर बगाएको जिल्ला प्रहरी कार्यालय गोरखाले जनाएको छ । प्रहरीका अनुसार नुर्वु ओङ्ग्याल, ओर्गेन छयोदेन, लाक्पा भुटी र मिङ्मार लामाको घर बाढीले पूर्णरूपमा बगाएको हो ।
वडाध्यक्ष पेमाग्याल्बो लामाका अनुसार बाढी आउँदा गाउँ नै भूकम्प आएजस्तो गरी थर्किएको थियो । आवाज सुनेपछि स्थानीय बासिन्दा घरबाट बाहिर निस्केर भागेका कारण मानवीय क्षति हुनबाट जोगिएको उनले बताए ।
बाढीबाट घरबारविहीन भएका चार परिवारलाई तत्काल राहत उपलब्ध गराइने वडाध्यक्ष लामाले जानकारी दिए । उनका अनुसार तत्काल खाद्यान्न तथा लत्ताकपडाका लागि प्रतिपरिवार रु २० हजारका दरले राहत दिइनेछ भने केही दिनभित्र गाउँपालिकाको तर्फबाट प्रतिपरिवार रु एक लाख बराबरको राहत उपलब्ध गराउने तयारी छ । अन्य निकायबाट राहत जुटाउनसमेत पहल गरिने उनले बताए।
