नुवाकोट । जीवन र मृत्युको दोसाँधमा बितेका ११ दिन। न खानेकुराको टुङ्गो, न एक घुट्को पानीको सहारा। चारैतिर त्रास, अँध्यारो र मृत्युको भयबीच पनि बाँच्ने आशा भने मरेको थिएन।
भोटेकोशी बाढीपछि त्रिशूली नदीमा आएको भीषण बाढीले नुवाकोटको विदुर नगरपालिका–१० बेत्रावतीस्थित स्थानीय आनन्द श्रेष्ठको घरसमेत प्रभावित बनायो। त्यसै घरको चौथो तलामा उनकी धर्मपत्नी चन्डिका श्रेष्ठ ११ दिनदेखि जीवन र मृत्युबीच संघर्ष गरिरहेकी थिइन्।
आशा लगभग समाप्त भइसकेको अवस्थामा शुक्रबार उद्धारकर्ताको आवाज सुनियो। भग्नावशेषबीच आएको त्यो आवाज चन्डिकाका लागि नयाँ जीवनको संकेत बन्यो।
सशस्त्र प्रहरी बलका इन्स्पेक्टर सुमन विकको कमाण्डमा खटिएको उद्धार टोलीले कठिन परिस्थितिबीच चौथो तलासम्म पुगेर चन्डिकालाई जीवितै उद्धार गरेको हो। उनलाई बाहिर निकाल्ने क्रममा उद्धारस्थलमा उपस्थित धेरैका आँखा रसाएका थिए।
११ दिनसम्मको भोक, प्यास र पीडाले शरीर शिथिल भए पनि उद्धारपछि चन्डिकाको अनुहारमा जीवन जोगिएको राहत प्रस्ट देखिन्थ्यो।
सशस्त्र प्रहरी बलका सह–प्रवक्ता डिएसपी शैलेन्द्र थापाका अनुसार जीवितै उद्धार गरिएकी चन्डिकालाई थप उपचार तथा आपत्कालीन उपचारका लागि हेलिकप्टरमार्फत काठमाडौं लैजाने तयारी भइरहेको छ।
भोटेकोशी बाढीपछि त्रिशूली नदीमा आएको विनाशले बस्ती र संरचनामा ठूलो क्षति पुर्याएको अवस्थामा ११ दिनपछि भग्नावशेषबाट चन्डिकाको जीवित उद्धारलाई आश्चर्यजनक घटनाका रूपमा हेरिएको छ।
उनको उद्धारले विपत्तिमा फसेकाहरूका लागि एउटा सन्देश पनि दिएको छ—आशा बाँकी रहेसम्म उद्धारको सम्भावना पनि बाँकी रहन्छ।
