काठमाडौँ । रसुवा बाढीमा परी ज्यान गुमाएकामध्ये हालसम्म १ हजार ३५५ जनाको शव फेला परेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। फेला परेका शवमा मानव अङ्गसमेत रहेको प्राधिकरणले स्पष्ट पारेको छ।
प्राधिकरणका अनुसार हालसम्म ९८ शवको सनाखत गरी आफन्तलाई बुझाइएको छ। प्रवक्ता शान्ती महतका अनुसार रसुवामा १६९, नुवाकोटमा १९७, धादिङमा ७०, गोरखामा ७५, तनहुँमा ३८, चितवनमा ३६३, नवलपरासी पूर्वमा २२२ र नवलपरासी पश्चिममा २२१ शव फेला परेका छन्।
बाढीपछि हालसम्म ४ हजार ९९६ जना सम्पर्कविहीन रहेको विवरण प्राप्त भएको छ। तीमध्ये रसुवा जिल्ला प्रशासन कार्यालयबाट करिब १ हजार ९६७ र नुवाकोटबाट करिब २ हजार ३४० नेपाली सम्पर्कविहीन रहेको विवरण अद्यावधिक गरिएको छ।
त्यस्तै, करिब १०० सुरक्षाकर्मी तथा कर्मचारी र ५८९ विदेशी नागरिक सम्पर्कविहीन रहेको प्राधिकरणले जनाएको छ। बाढीमा फसेका १३ हजार ३९६ जनाको उद्धार भइसकेको छ।
बाढीबाट घाइते भएका ६ हजार ६७२ जनाको उपचार गरिएको छ। विभिन्न अस्पतालमा उपचाररत ३२३ जनामध्ये २२८ जना उपचारपछि घर फर्किएका छन्।
प्रभावित क्षेत्रमा स्थापना गरिएका ३९ वटा होल्डिङ सेन्टरमा ३ हजार ५३३ जना बाढी प्रभावित रहेका छन्। तीमध्ये रसुवामा ६६९, नुवाकोटमा २ हजार ६५१ र धादिङमा २१३ जना रहेको प्राधिकरणले जनाएको छ।
उद्धार, राहत तथा सुरक्षा व्यवस्थापनका लागि २१ हजार ४०२ सुरक्षाकर्मी परिचालन गरिएको छ। नेपाली सेनाका ९ हजार २८७, नेपाल प्रहरीका ७ हजार ९१२ र सशस्त्र प्रहरी बलका ४ हजार २०३ जना सुरक्षाकर्मी प्रभावित क्षेत्रमा खोज, उद्धार तथा राहत कार्यमा खटिएका छन्।
