काठमाडौँ । गृहमन्त्री सुधन गुरुङले सुकुम्वासी व्यवस्थापनका क्रममा भएका कमी-कमजोरीलाई सुधार गर्दै सरकार अघि बढ्ने प्रतिबद्धता व्यक्त गरेका छन् ।
राष्ट्रिय सभामा मन्त्रालयगत बजेटमाथिको छलफलका क्रममा सांसदहरूले उठाएका प्रश्नको जवाफ दिँदै मन्त्री गुरुङले सुकुम्वासी सहित सबै नागरिकका समस्याप्रति सरकार संवेदनशील रहेको बताएका हुन् ।
छलफलका क्रममा नेपाली कम्युनिस्ट पार्टीकी सांसद रेणु चन्दले विगतमा महिलाका विषयमा संवेदनशील रहेको अभिव्यक्ति दिएका गृहमन्त्रीसँग सुकुम्वासी बस्ती हटाउने क्रममा प्रभावित भएका महिलाका समस्या सम्बोधन गर्न गृह मन्त्रालयको भूमिका के रहने भन्ने प्रश्न गरेकी थिइन् ।
उनले विस्थापनपछि समस्यामा परेका सुकुम्वासी महिलाका लागि सरकारको सहयोग र संरक्षणको ढोका खुला रहेको छ कि छैन भन्ने विषयमा मन्त्रीको ध्यानाकर्षण गराएकी थिइन् ।
जवाफमा गृहमन्त्री गुरुङले गृह मन्त्रालय सबै नागरिकका लागि खुला रहने र नागरिकका समस्या सुन्ने संयन्त्रका रूपमा काम गरिरहेको बताए । उनले महिलासम्बन्धी विषयमा मन्त्रालयले संवेदनशीलताका साथ काम गरिरहेको उल्लेख गरे ।
उनले सुकुम्वासीको विषयमा पनि सरकार गम्भीर रहेको बताउँदै व्यवस्थापन प्रक्रियामा देखिएका कुनै त्रुटि वा कमजोरी भए त्यसलाई सच्याएर समाधानमुखी ढंगले अघि बढ्ने स्पष्ट पारे ।
गृहमन्त्री गुरुङले नागरिकका समस्या सम्बोधन गर्ने क्रममा स्थलगत रूपमा समेत काम भइरहेको र प्रभावित पक्षका विषयलाई प्राथमिकतामा राखिने बताए ।
