काठमाडौं । नेपाली पुरुष भलिबललाई फ्रेन्चाइज र व्यावसायिक मोडलमा अघि बढाउने लक्ष्यसहित आयोजना गरिएको नेपाल भलिबल लिग (एनभीएल) को पहिलो संस्करण आजदेखि काठमाडौंमा सुरु हुँदैछ । पहिलो संस्करणमा ६ फ्रेन्चाइज टोलीले उपाधिका लागि प्रतिस्पर्धा गर्दैछन् ।
केडिया ग्रुपको आयोजनामा हुने प्रतियोगिताको उद्घाटन खेलमा आज सगरमाथा स्म्यासर्स र मधेश वारियर्स आमनेसामने हुँदैछन् । त्रिपुरेश्वरस्थित दशरथ रंगशाला कभर्डहलमा हुने खेल अपराह्न ४ बजे सुरु हुनेछ ।
पहिलो दिनको दोस्रो खेलमा अन्नपूर्ण स्पाइकर किंग्स र कर्णाली यशविसबीच प्रतिस्पर्धा हुनेछ । उक्त खेल साँझ ७ बजे सुरु हुने आयोजकले जनाएको छ ।
एनभीएलको पहिलो दिन टिकट बिक्रीबाट संकलित सम्पूर्ण रकम बाढीपीडितको सहयोगका लागि प्रधानमन्त्री दैवी प्रकोप उद्धार कोषमा जम्मा गरिने आयोजकले यसअघि नै घोषणा गरिसकेको छ ।
यस्तो हुनेछ प्रतियोगिताको ढाँचा
प्रतियोगितामा सहभागी ६ टोलीले सिंगल राउन्ड रोबिन प्रणालीमा एकअर्काविरुद्ध प्रतिस्पर्धा गर्नेछन् । लिग चरण सकिएपछि शीर्ष स्थानमा रहने टोली सिधै फाइनलमा पुग्नेछ ।
दोस्रो र तेस्रो स्थानमा रहने टोलीले फाइनल प्रवेशका लागि प्लेअफ खेल्नेछन् । पहिलो संस्करणमा सगरमाथा स्म्यासर्स, मधेश वारियर्स, काठमाडौं रेड्स, अन्नपूर्ण स्पाइकर किंग्स, कर्णाली यशविस र खप्तड फाल्कन्स सुदूरपश्चिम सहभागी छन् ।
विजेतालाई २० लाख रुपैयाँ
एनभीएलको पहिलो संस्करणको विजेताले २० लाख रुपैयाँ नगद पुरस्कार प्राप्त गर्नेछ । यो नेपाली भलिबलको इतिहासमै सर्वाधिक पुरस्कार राशि भएको आयोजकको दाबी छ ।
प्रतियोगिताको कुल पुरस्कार राशि ३२ लाख रुपैयाँ रहेको छ । बाँकी १२ लाख रुपैयाँ उपविजेता, विधागत पुरस्कार तथा प्लेयर अफ द म्याचलगायतका अवार्डमा प्रदान गरिनेछ ।
१० देशका १८ विदेशी खेलाडी
एनभीएलको पहिलो संस्करणमा विभिन्न १० देशका १८ विदेशी खेलाडी सहभागी हुँदैछन् । नेपालमा आयोजना हुने पुरुष भलिबल प्रतियोगिताको इतिहासमै एउटै प्रतियोगितामा यति ठूलो संख्यामा विदेशी खेलाडी सहभागी हुन लागेको यो पहिलो पटक हो ।
प्रतियोगितामा पाकिस्तानबाट पाँच, भारत र मंगोलियाबाट तीन–तीन खेलाडी सहभागी छन् । त्यस्तै इरान, रुस, पोल्यान्ड, बेलारुस, सर्विया, ब्राजिल र बेनिनबाट एक–एक खेलाडीले प्रतिस्पर्धा गर्नेछन् ।
यसअघि नेपालमा हुने पुरुष भलिबल प्रतियोगितामा भारत र पाकिस्तानका खेलाडीको सहभागिता बढी हुने गरेको भए पनि एनभीएलमा एसियादेखि युरोप र दक्षिण अमेरिकासम्मका खेलाडी सहभागी भएका छन् ।
विदेशी खेलाडीको सहभागिताले नेपाली खेलाडीलाई अन्तर्राष्ट्रिय स्तरका खेलाडीसँग घरेलु कोर्टमै प्रतिस्पर्धा गर्ने अवसर प्रदान गर्ने अपेक्षा गरिएको छ ।
नयाँ प्रतिभालाई पनि अवसर
फ्रेन्चाइज टोली, खेलाडी अक्सन, विदेशी खेलाडीको सहभागिता र आकर्षक पुरस्कारका कारण एनभीएलको पहिलो संस्करणप्रति नेपाली भलिबल समर्थकको उत्साह बढेको छ ।
प्रतियोगितामा राष्ट्रिय टोलीका अनुभवी खेलाडीसँगै ट्यालेन्ट हन्टबाट छनोट भएका युवा खेलाडीले पनि अवसर पाएका छन् । ६ वटै फ्रेन्चाइज टोलीले ट्यालेन्ट हन्टमार्फत १९ वर्षमुनिका एक–एक खेलाडीलाई टोलीमा समावेश गरेका छन् ।
नयाँ पुस्ताका खेलाडीका लागि राष्ट्रिय तथा अन्तर्राष्ट्रिय खेलाडीसँग एउटै ड्रेसिङ रुम साझा गर्दै कोर्टमा प्रतिस्पर्धा गर्ने अवसरले उनीहरूको अनुभव र क्षमता विकासमा महत्वपूर्ण योगदान पुर्याउने अपेक्षा गरिएको छ ।
‘उचाइको नयाँ उडान’ भन्ने नारासहित सुरु हुन लागेको एनभीएलले नेपाली पुरुष भलिबललाई व्यावसायिकतातर्फ अघि बढाउँदै खेलको स्तर र लोकप्रियता थप उचाइमा पुर्याउने विश्वास आयोजकले लिएको छ ।
